Web Hosting by Netfirms | Free Domain Names by Netfirms

Kalachuchi Ibabaw sa Karo sa Santo Entierro

Hamiling bulak nga puti taliwala sa kaguol ug luha
Mahayag nga talan-awon sa kangitngit sa tawhanong diwa
Sinug-an lamang sa sulo ug tag-piso nga kandila
Masanagong panig-ingnan sa among nangalawos nga tinguha.

Nangalimyon ka sa katam-is sa pagpasakit nga wa'y sama
Nianang Tawo nga naghigda, samaran ug hinuboan sa kinabuhi
Ibabaw nianang karo nga dakong timaan sa pag-ula
Sa dugo ug singot alang sa paghigugma sa pinili

Nagsunud-sunod ang Soledad sa karo nga imong gi-adornohan
Nagpas-an sa usa ka masulub-on ug nagtiyabaw'ng Inahan
Nga nag-agulo sa kamatayon sa Anak nga buotan,
Ug kinsang kasingkasing sa pito ka bangkaw gilagbasan.

Yano nga puting kalachuchi sa karo sa namatay'ng Jesus,
Timaan ikaw sa among naghingaping kakabus,
Timaan ikaw sa tumang pagkamapaubsanon--
Usa ka mithi nga nianang patay'ng Tawo giangkon.

Kalachuchi, hubga kami sa imong hilum nga pagsaksi
Ug pagbarog nga maisugon taliwala sa mga pag-antus
Aron kami sab mamahimong takos mopahamili
Tulo ka adlaw sumad karon, sa karo sa nabanhaw'ng Jesus.