Web Hosting by Netfirms | Free Domain Names by Netfirms

Human sa Prusisyon sa Dolorosa

Naanud na sa hangin
Ang katapusang nota gikan sa biyolin
Ug mihunong ang karo sa bābā sa simbahan.

Nagsing-uliay na ang ubang mga tawo;
Apan ako ug ang akong anak nagpabilin--
Nakigduut sa mga tawo paingon sa karo
Aron mangutlo og buwak

Nga nabantug sa iyang makaalim nga hiyas,

Nga kuno makaayo sa nagkadaiyang balatian,

Nga sama sa benditadong palma sa Domingo sa Lukay,
Makapanalipod kuno batok sa mga katalagman,

ug mga pag-antus,

ug mga kasakit,

ug mga pagdaug-daug

Nga among kalan-on matag adlaw.

Gamhanan pa diay kining buwak kay sa Dios.
Karon pa ako misulay og pagpangutlo
Niining buwak sa karo--
Usa sa mga kataposang pagdumili
Sa akong kahimtang sa kakabus.